Náttúrufræðingurinn

Fors_84_12

Nýr Náttúrufræðingur, 84. árg. 1.–2. hefti, er nýkominn út og er það fyrsta blaðið sem kemur út eftir að samstarf hófst milli Hins íslenska náttúrufræðifélags og Náttúruminjasafns Íslands um útgáfu tímaritsins, samanber umfjöllun hér.

 

 

 

 

Að venju er að finna forvitnilegar greinar um náttúru landsins í hinu nýja hefti Náttúrufræðingsins. Meðal áhugaverðra greina er umfjöllun sérfræðinga á Hafrannsóknastofnuninni um vistkerfi Íslandshafs og breytingar á lífsháttum loðnunnar, en þar er byggt á rannsóknaniðurstöðum í viðamiklu verkefni sem stóð yfir árin 2006-2011. Þá er einkar athyglisverð grein eftir dr. Árna Hjartarson jarðfræðing, Hallmundarkviða, eldforn lýsing á eldgosi, en frá náttúrufræðilegu sjónarmiði er kviðan einn merkilegasti texti fornritanna en lengst af vanmetinn í því samhengi. Hallmundarkviða lýsir eldsumbrotum og viðhorfum heiðinna manna til þeirra og setur hamfarirnar í goðsögulegt samhengi. 

Hægt er að nálgast efnisyfirlit blaðsins hér.
PDF-x.

Dagur íslenskrar náttúru

Dagur íslenskrar náttúru er í ár haldinn hátíðlegur þriðjudaginn 16. september. Af því tilefni verða skrifstofur Náttúruminjasafns Íslands í gömlu Loftskeytastöðinni að Brynjólfsgötu 5 opnar almenningi milli kl. 14 og 17. Þá býðst gestum að skoða þetta tæprar aldargamla og glæsilega hús og forstöðumaður stofnunarinnar, dr. Hilmar J. Malmquist, spjallar við gesti um forsögu og framtíðarhorfur höfuðsafns þjóðarinnar á sviði náttúrufræða.

Ljósm.: Kristján Jónasson
Ljósmynd: Kristján Jónasson

Umhverfis- og auðlindaráðuneytið heldur utan dagskrá í tilefni dagsins. Að þessu sinni beinir ráðuneytið athyglinni sérstaklega að mikilvægi þess að bera virðingu fyrir náttúrunni.

Um Dag íslenskrar náttúru má fræðast almennt hér.

Brýn þörf á náttúruvernd segir OECD

2008-07-26 18.03.43

Ljósm. Kristján Jónasson

Í dag var kynnt á Hótel Natura heildarúttekt Efnahags- og framfarastofnunar Evrópu (OECD) á umhverfismálum á Íslandi árin 2001 – 2013. Ekki kemur á óvart að íslensk náttúra hefur gegnt lykilhlutverki í efnahagsbata landsins, bæði vegna orkuauðlinda hennar sem og aðdráttarafls fyrir erlenda ferðamenn. Við sem gistum þetta land búum við einstaklega gjöfula, fagra og heilnæma náttúru, sem óvíða er að finna annars staðar. En það eru blikur á lofti. Varnaðarorð skýrlsuhöfunda eru þau m.a. að umgengni okkar við náttúruauðlindirnar sé að vissu leyti ábótavant og úrbóta þörf. Hér er vísað bæði til þess að þegar sjáist merki um álag á náttúruperlum vegna ágangs af völdum ferðamanna og að nýting enurnýjanlegra orkugjafa hefur för með sér rask og mengun sem ekki er í öllum tilvikum reiknað með eða gerðar ráðstafanir gegn.

Meginskilaboð skýrsluhöfunda til Íslendinga eru að þeir verða að mæta vexti í orku- og ferðageiranum með því að vernda náttúruna (e. „Iceland must balance growth in power and tourism industries with nature conservation, OECD says“). Sjálfbær nýting náttúrugæða landsins verður að byggjast á því að halda höfuðstólnum óskertum – ella rýrna auðlindirnar og lífskjör versna.

Náttúruminjasafn Íslands hefur mikilvægu hlutverki að gegna í þessu samhengi sem höfuðsafn á sviði náttúrufræða. Helstu hlutverk stofnunarinnar eru lögum samkvæmt að miðla fróðleik, upplýsingum og þekkingu um náttúru landsins, náttúrusögu, nýtingu náttúruauðlinda og náttúruvernd. Þá segir í lögum um stofnunina að miðlunin skuli beinast til skóla, fjölmiðla og almennings, jafnt með sýningahaldi og kynningu af öðru tagi.

Nánar má lesa um kynninguna og skýrlsu OECD hér á heimasíðu umhverfis- og auðlindaráðuneytisins.

Skýrsla OECD í heild.

Útdráttur úr skýrlsu OECD.