Út er komin greinin Tegundir eru ekki eini mælikvarðinn á líffræðilega fjölbreytni: Ferlaheimspekileg sýn á hugtök í verndarlíffræði en hún birtist nú í janúar í tímaritinu Marine Ecology. Um er að ræða þverfaglega grein sem unnin er í samstarfi milli Háskólans á Hólum, Náttúruminjasafns Íslands og Háskóla Íslands en efnistökin byggja á hugmyndafræði BIODICE sem er samstarfsvettvangur stofnana, einstaklinga og fyrirtækja sem vilja auka veg og vanda umræðu um líffræðilegrar fjölbreytni.

Greinin fjallar um mikilvægi þess að taka ekki bara til greina tegundahugtakið þegar um er að ræða náttúruvernd og stefnumótun þar að lútandi heldur einnig mikilvægi þess að horfa til sambands, tengsla og ferla sem liggja til grundvallar tilurðar líffræðilegrar fjölbreytni. Ísland býr yfir mörgum einstökum eiginleikum sem bjóða upp á frábær tækifæri til að rannsaka þessi tengsl og ferla og má færa rök fyrir því að við hér getum verið í fararbroddi þekkingarleitar á þessu sviði og þannig fremst meðal þjóða við þróun skilvirkar áætlunar til verndar líffræðilegri fjölbreytni og þar með náttúrunni.