Steinagreining

Sumir steinar eru glitrandi, aðrir rauðir eða grænir. Við skoðum fjölbreytta steina og fjöllum um hvernig steinar verða til í eldgosum og aðrir vaxa úr vatni. Nemendum gefst tækifæri á að spreyta sig á aðferðum sem notaðir eru til að greina steina og við veltum fyrir okkur samspili eldgosa, jökla og fjalla.

Markmið heimsóknarinnar er að nemendur læri muninn á frumsteindum og síðsteindum (steinar sem myndast í eldgosum og steinar sem vaxa eftir á), kynnist aðferðum sem notaðar eru við að greina steina og fræðist um jarðbreytileika Íslands og mikilvægi náttúruverndar.

Fyrirkomulag heimsóknar

Tekið er á móti skólahópum við inngang Perlunnar og þeim fylgt upp á 2. hæð þar sem sýning Náttúruminjasafnsins, Vatnið í náttúru Íslands er. Þar er fatahengi og hægt að hengja upp útifatnað. Hópurinn kemur svo saman fyrir framan steinahringinn á sýningunni. Safnkennarar bjóða hópinn velkominn, fara yfir fyrirkomulag heimsóknarinnar og tala við nemendur um steina og jarðfræði með áherslu á muninn á frum- og síðsteindum.

Því næst fá nemendur að skoða mismunandi steina og spreyta sig á aðferðum sem notaðar eru til að greina þá. Að því loknu gefst tími til að skoða önnur atriði sýningarinnar. Í lok heimsóknar er stoppað við nýja sýningu á vegum Vatnajökulsþjóðgarðs, Hvað býr í þjóðgarði? og fjallað um samspil elds og íss. Heimsóknin tekur um 50 mínútur.

Með tilliti til stærðar sýningarinnar er æskilegt að ekki séu fleiri en 25 börn í hverjum hópi til þess að þau njóti heimsóknarinnar sem best.

Bókanir skólahópa í fræðslu hjá Náttúruminjasafninu fara fram á bókunarsíðu safnsins

Undirbúningur og eftirfylgni fræðsluleiðarinnar

Fróðleiksbrunnurinn er ný fræðslusíða Náttúruminjasafns Íslands í náttúrufræðum. Efnið hentar til undirbúnings og eftirfylgni heimsóknar á sýninguna Vatnið í náttúru Íslands en er einnig kjörið til notkunar í skólum. Hér fyrir neðan eru hlekkir á fræðsluefni sem getur hentað til undirbúnings og eftirfylgni fyrir fræðsluleiðina.

Náttúrufræðsla – Líf í fersku vatni

Náttúrufræðsla – Líffræðileg fjölbreytni

Náttúrufræðsla – Vatnið

Tenging við Aðalnámsskrá

Heimsóknin nýtist sem stuðningur við kennslu í náttúrufræði og tengist bæði hæfniviðmiðum um verklag og viðfangsefni. Fræðsluleiðin hentar sérstaklega vel hæfniviðmiðum um að búa á jörðinni þar sem áhersla er lögð á steina og hvernig þeir myndast í tengslum við myndun og uppbyggingu Íslands og hvernig landslag og jarðvegur breytist. Nemendur fá auk þess innsýn í vísindaleg vinnubrögð, ræða atriði í umhverfi sínu, samspil manns og náttúru og forsendur náttúruverndar.