Samstarf Háskólans á Hólum og Náttúruminjasafns Íslands

Samstarf Háskólans á Hólum og Náttúruminjasafns Íslands

Samstarf Háskólans á Hólum og Náttúruminjasafns Íslands

Hólmfríður Sveinsdóttir rektor Háskólans á Hólum og Hilmar J. Malmquist forstöðumaður Náttúruminjasafns Íslands undirrituðu 31. janúar síðastliðinn rammasamkomulag um samstarf stofnananna um rannsóknir og miðlun á sviði náttúrufræða. Markmið samkomulagsins er að efla samstarf fræðimanna og nemenda á vegum stofnananna um rannsóknir og miðlun á fræðasviðum sínum.

Stofnanirnar hafa átt í nánu og gjöfulu samstarfi um árabil, en fyrri samstarfssamningur stofnanna var undirritaður haustið 2014. Það var jafnframt fyrsti samstarfssamningurinn sem Náttúruminjasafnið stóð að við aðra rannsókna- og menntastofnun síðan safnið var sett á laggirnar árið 2007.

Í viðauka með nýja rammasamkomulaginu er að finna nánari útfærslu á fyrirkomulagi og efnistökum í sérstöku samstarfsverkefni sem stofnanirnar hafa unnið að undanfarin ár.

Hilmar J. Malmquist, forstöðumaður Náttúruminjasafns Íslands, og Hólmfríður Sveinsdóttir, rektor Háskólans á Hólum, undirrita rammasamkomulagið.

Þar er um að ræða rannsóknir á líffræðilegri fjölbreytni á Íslandi og nýtingu afraksturs þeirra rannsókna til miðlunar, jafnt til almennings, fræðasamfélagsins og stjórnsýslunnar. Fyrir þessum rannsóknunum fer dr. Skúli Skúlason prófessor við Háskólann á Hólum og sérfræðingur hjá Náttúruminjasafninu og deila stofnanirnar tvær með sér til helminga launa- og skrifstofukostnaði vegna starfa Skúla.

Á meðal afurða verkefnisins um líffræðilega fjölbreytni er uppbygging samráðsvettvangsins BIODICE (biodice.is), sem er vettvangur á fjórða hundrað einstaklinga, stofnana og fyrirtækja sem láta sig varða málefni líffræðilegrar fjölbreytni á Íslandi. Meginmarkmið BIODICE vettvangsins er að efla þekkingu og skilning á líffræðilegri fjölbreytni á Íslandi.

Rannsóknir, verndun og miðlun á líffræðilegri fjölbreytni eru með brýnustu viðfangsefna mannkyns nú á tímum og varðar sjálfbæra framtíð og farsæld komandi kynslóða. Viðfangsefnið fellur vel að starfsemi og  stefnum Háskólans á Hólum og Náttúruminjasafnsins og við báðar stofnanir starfa sérfræðingar sem búa yfir yfirgripsmikilli þekkingu og reynslu á sviði líffræðilegrar fjölbreytni, jafnt hvað varðar rannsóknir sem miðlun.

„Þetta rammasamkomulag við Háskólann á Hólum er afar ánægjulegt og mjög mikilvægt fyrir Náttúruminjasafnið, ekki síst með hliðsjón af starfsemi safnsins og framtíðaraðstöðu í nýju höfuðstöðvunum á Seltjarnarnesi, Náttúruhúsinu i Nesi, sem stefnt er að opna haustið 2025.“ segir Hilmar J. Malmquist forstöðumaður Náttúruminjasafnsins. „Meginþema grunnsýningarinnar í Náttúruhúsinu mun snúast um hafið þar sem líffræðileg fjölbreytni sjávarlífríkis verður í aðalhlutverki. Í Náttúruhúsinu verður öll aðstaða til að miðla og fræða um fjölbreytileika náttúru Íslands með því besta sem völ er á. Þar með rætist einn þátturinn í stefnu stjórnvalda um líffræðilega fjölbreytni, nefnilega sá að Náttúruminjasafn Íslands skuli gegna lykilhlutverki í fræðslu um lífríki landsins þegar safnið eignast eigin aðstöðu og húsnæði undir starfsemi sína.“ segir Hilmar J. Malmquist.

Hólmfríður Sveinsdóttir, rektor Háskólans á Hólum tekur í sama streng og segir “Rammasamkomulagið er afar mikilvægt fyrir Háskólann á Hólum. Skólinn fer fyrir verkefni þar sem markmiðið er að þróa nám og rannsóknir í sjálfbæru lagareldi á háskólastigi og verður  m.a. líffræðilegur fjölbreytileiki eitt af áhersluþáttum í bæði náminu og rannsóknunum. Ásamt opinberu háskólunum, Háskólasetri Vestfjarða, Matís og Hafró er Náttúruminjasafn Íslands einn af samstarfsaðilum í verkefninu”. Í undirbúningi er uppbygging á hátækni kennslu- og rannsóknahúsnæði í lagareldi við Háskólann á Hólum. „Í þessu nýja húsnæði verður miðlun rannsókna tengd sjávar- og vatnalíffræði ásamt lagareldi gerð góð skil í sérstöku sýningarrými og í því sambandi mun samstarfið við Náttúruminjasafnið vera afar verðmætt.” segir Hólmfríður.

Heimsókn frá menningar- og viðskiptaráðuneytinu

Heimsókn frá menningar- og viðskiptaráðuneytinu

Heimsókn frá menningar- og viðskiptaráðuneytinu

Á dögunum tókum við hjá Náttúruminjasafni Íslands á móti góðum gestum þegar fulltrúar menningar- og viðskiptaráðuneytisins sóttu okkur heim. Sigrún Brynja Einarsdóttir ráðuneytisstjóri, skrifstofustjórarnir Arna Kristín Einarsdóttir og Guðrún Gunnarsdóttir, sem og tengiliður safnsins við ráðuneytið, Vilhelmína Jónsdóttir, komu til að kynna sér starfsemi safnsins betur.

Hilmar J. Malmquist forstöðumaður leiddi heimsóknina með greinagóðri kynningu á margvíslegum verkefnum safnsins og framtíðarhorfum. Framundan eru spennandi tímar hjá Náttúruminjasafninu en vinna við hönnun nýrrar grunnsýningar í Náttúruhúsi í Nesi er í fullum gangi. Sýningin mun hverfast um hafið og lífríki þess með áherslu á mikilvægi líffræðilegrar fjölbreytni. Heimsókninni lauk úti á Seltjarnarnesi þar sem hinar fallegu framtíðarhöfuðstöðvar voru skoðaðar.

Við þökkum ráðuneytiskonum kærlega fyrir komuna.

Starfsmenn Náttúruminjasafnsins ásamt fulltrúum menningar- og viðskiptaráðuneytisins.

Hilmar J. Malmquist kynnir starfsemi Náttúruminjasafnsins fyrir gestum.

Frá vinstri: Sigrún Brynja Einarsdóttir, ráðuneytisstjóri MVF, Hilmar J. Malmquist, forstöðumaður NMSÍ, Anna Katrín Guðmundsdóttir, verkefnastjóri NMSÍ, Arna Kristín Einarsdóttir, skrifstofustjóri MVF, Ragnhildur Guðmundsdóttir, líffræðingur NMSÍ og Vilhelmína Jónsdóttir, sérfræðingur MVF.

Samstarf við Grasagarðinn í Reykjavík

Samstarf við Grasagarðinn í Reykjavík

Samstarf við Grasagarðinn í Reykjavík

Á sýningu Náttúruminjasafns Íslands, Vatnið í náttúru Íslands í Perlunni, fræðumst við um margs konar birtingarmyndir ferksvatns á Íslandi. Vatnið er mikilvægt öllum lífverum, í lindum og ám, þar á meðal plöntum sem reiða sig á vatnið eins og aðrar lífverur. Þá leikur vatn um berg og jarðveg og tekur með því stóran þátt í að móta landið.

Á sýningunni má finna lifandi plöntur sem finnast í íslenskri náttúru í sérstökum gróðurkúlum. Lögð er áhersla á að skipta gróðrinum út eftir árstíðum til að sýna fjölbreytt úrval plantna sem er í blóma á hverjum tíma.

Síðastliðið haust gerðu Náttúruminjasafnið og Grasagarðurinn í Reykjavík með sér óformlegan samning um samstarf og kemur allur gróður á sýningunni frá Grasagarðinum. Fleira er á döfinni, þar með talið sameiginlegt viðburðahald og munu stofnanirnar halda saman viðburð á Degi hinna villtu blóma þann 16. júní.

Dagur hinna villtu blóma

Dagur hinna villtu blóma

Geldingadalir gas

Viðburður: Dagur hinna villtu blóma 

Dagsetning: Sunnudagur 16. júní

Staðsetning: Úlfarsárdalur

Tími: Auglýstur síðar

Samstarfsviðburður Náttúruminjasafns Íslands og Grasagarðs Reykjavíkur.

Nánar um viðburðinn kemur síðar.

 

 

Hvað býr í þjóðgarði?

Hvað býr í þjóðgarði?

Geldingadalir gas

Viðburður: Hvað býr í þjóðgarði – Kynnumst fjölbreytileika Vatnajökulsþjóðgarðs

Dagsetning: Sunnudagur 2. júní

Staðsetning: Perlan, 2. hæð

Tími: kl. 14 – 16

Kynnumst náttúruundrum Vatnajökulsþjóðgarðs og fræðumst um starf landvarða.

Sérfræðingar Náttúruminjasafnsins og Vatnajökulsþjóðgarðs bjóða gesti velkomna á sýningarnar Vatnið í náttúru íslands og Hvað býr í þjóðgarði?

Á Spennandi sunnudögum bjóðum við upp fjölskylduviðburði á sýningu safnsins, Vatnið í náttúru Íslands í Perlunni.

Kjörið tækifæri fyrir fjölskyldur til að skemmta sér og tengjast náttúrunni á óvenjulegan og skemmtilegan hátt.

Aðgangur er ókeypis. Hlökkum til að sjá ykkur!

Náttúruminjasafn Íslands er með fjölbreytta fjölskylduviðburði fyrsta sunnudag hvers mánaðar víða á höfuðborgarsvæðinu.