Sunnudaginn 21. maí var Dagur barnsins og hann var sannarlegur gleðidagur fyrir Náttúruminjasafnið og Vatnajökulsþjóðgarð þegar 5. úthlutun úr Barnamenningarsjóði Íslands fór fram.

Stofnanirnar fengu úthlutað 5 milljón króna styrk fyrir samstarfsverkefni sem ber heitið – Eldur, ís og mjúkur mosi og verður unnið í samstarfi við listafólk og skóla í nágreni þjóðgarðsins. Fjölbreyttar smiðjur munu fara fram í skólum í nágrenni þjóðgarðsins í haust sem verða uppspretta sýninga og ýmissa viðburða í gestastofum hans.  Einnig verður sett upp samsýning í sýningarrými Náttúruminjasafnsins á 2. hæð Perlunnar auk þess sem þátttakendur verkefnisins skipuleggja málþing til að velta upp spurningum eins ,,Hvað er náttúruvernd og hvernig getum við komið betur fram við náttúruna?‘‘.

Við hlökkum til samstarfsins og erum spennt að hefjast handa!

Hlutverk Barnamenningarsjóðs er að fjármagna og styðja við fjölbreytta starfsemi á sviði barnamenningar með áherslu á sköpun, listir og virka þátttöku barna í menningarlífi. Sjóðurinn styrkir að þessu sinni 41 spennandi verkefni og nánari upplýsingar um þau má finna hér á heimasíðu Rannís.

Fulltrúar Náttúruminjasafnsins og Vatnajökulsþjóðgarðs voru viðstödd styrkúthlutunina. Frá vinstri: Benedikt Traustason, Anna Katrín Guðmundsdóttir, Ragnhildur Guðmundsdóttir, Ingibjörg Halldórsdóttir og Helga Aradóttir.

Nemendur í 3. bekk í Fellaskóli í Reykjavík unnu með fléttur á skemmtilegan hátt.

Listafólkið sem tók þátt voru Björk Þorgrímsdóttir, Heimir Freyr Hlöðversson, Elín Elísabet Einarsdóttir, Rán Flygenring, Sverrir Norland og Friðgeir Jóhann Kristjánsson. Skólarnir sem tóku þátt voru Fellaskóli í Reykjavík, Reykjahlíðarskóli í Mývatnssveit, Eskifjarðarskóli, Grunnskóli Snæfellsbæjar, bæði norðan heiða sem og Lýsudeild, Stapaskóli og Flúðaskóli auk frístundaheimilisins Húnaklúbbsins á Hvammstanga. Nemendur nýttu svo innblásturinn og hugmyndirnar sem komu fram í smiðjunum til að þróa og skapa listaverk fyrir sýninguna. Skemmtilegt var að sjá hversu fjölbreytt verkefnin voru og endurspegluðu þau gjarnan nánasta umhverfi skólanna.

Nemendur í Flúðaskóla unnu með víðsjár og tóku ljósmyndir af sýnum sem þau söfnuðu í náttúrunni.

Nemendur í Grunnskóla Snæfellsbæjar, norðan heiða unnu með vistkerfi og fæðuvefi. Veltu fyrir sér lífverunum og samspili þeirra.

Sýningin á verkum nemendanna er opin öllum, og er hún staðsett í Dropanum, sérsýningarrými Náttúruminjasafnsins á 2. hæð í Perlunni. Einnig er hægt að kynna sér verkefni skólanna á Fróðleiksbrunninum. Sýningin í Perlunni er opin fram til 7. maí en hún er einnig hluti af Hátíð líffræðilegrar fjölbreytni sem BIODICE stendur að og er ætlað að skerpa á þeirri vitundarvakningu sem loks hefur orðið um mikilvægi líffræðilegrar fjölbreytni síðustu misseri.

Við hvetjum ykkur öll til að gera ykkur ferð á sýninguna í Perlunni!

Fréttir um verkefnið á heimasíðu Grunnskóla Snæfellsbæjar: frétt 1, frétt 2, frétt 3,

Fréttir um verkefnið á heimasíðu Stapaskóla í Reykjanesbæ: frétt 1, frétt 2

Frétt um verkefnið á heimasíðu Fellaskóla í Reykjavík: frétt

Hvernig er hægt að vekja áhuga ungs fólks á samfélagi, listum og náttúru í gegnum söfn? Hvernig má nýta safnheimsóknir til að hvetja nemendur til sjálfstæðra vinnubragða og túlkunar?

Nemendur í áfanga í menningarlæsi við Tækniskólann kynna verkefni þar sem þeir tengdu saman söfnin þrjú.

Skipuleggjendur verkefnisins að lokinni kynningu á söfnunum í Tækniskólanum: Jóhanna Bergmann, Ragnhildur Guðmundsdóttir, Helga Aradóttir, Ragnheiður Vignisdóttir og Kolbrún Kolbeinsdóttir

Samstarfið hefst á nýju ári með sérsýningu um Vatnajökulsþjóðgarð í Dropanum í Perlunni, við hlið sýningar Náttúruminjasafnsins, Vatnið í náttúru Íslands.

Markmið sýningarinnar er að kynna náttúruvernd, þjóðgarðinn og það fjölbreytta starf sem þar fer fram fyrir skólahópum og öðrum gestum sem koma til með að heimsækja sýninguna auk þess sem fjölbreyttir viðburðir munu fléttast inn í dagskrá Náttúruminjasafnsins og Vatnajökulsþjóðgarðs.

Miðvikudaginn 22. október undirrituðu Hilmar J. Malmquist forstöðumaður Náttúruminjasafns Íslands og Eydís Líndal Finnbogadóttir forstjóri Náttúrufræðistofnunar Íslands samkomulag um áframhaldandi samstarf stofnananna tveggja á sviði rannsókna og miðlunar. Samkomulagið byggir á eldri samningi sem stofnanirnar gerðu með sér árið 2012 með fáeinum breytingum. Í lögum um Náttúruminjasafn Íslands nr. 35/2007 kemur fram að þessar náskyldu stofnanir skuli hafa með sér náið samstarfs sem grundvallist á sérstöku samkomulagi milli þeirra.

Náttúruminjasafn Íslands er höfuðsafn á sviði náttúrufræða sem sinnir rannsóknum á fræðasviði sínu og er miðstöð miðlunar á upplýsingum og þekkingu um náttúru Íslands, náttúrusögu, náttúruvernd og nýtingu náttúruauðlinda. Náttúrufræðistofnun Íslands, sem fram að stofnun Náttúruminjasafnsins árið 2007 gegndi að hluta til svipuðu miðlunarhlutverki og Náttúruminjasafnið sinnir í dag, starfar á sviði náttúruvísinda og náttúruverndar og hefur það að meginhlutverki að hafa heildaryfirsýn yfir náttúru landsins með því að stunda vöktun og grunnrannsóknir. Stofnunin varðveitir jafnframt niðurstöður, eintök og muni í fræðilegum söfnum er veita sem best yfirlit um náttúru landsins.

Nýja samkomulagið felur í sér náið samstarf stofnananna um málefni sem varða m.a. líffræðilega fjölbreytni, jarðfræði, flokkunarfræði og miðlun. Stofnanirnar munu einnig vinna náið og á gagnkvæman hátt með gagnasöfn sín og safnkost, jafnt vegna sýninga og annarrar starfsemi. Auk þessa er að finna ákvæði um samnýtingu á aðstöðu hjá Náttúrufræðistofnun til varðveislu og rannsókna á náttúrugripum og munum sem aflað er vegna miðlunar og rannsókna á vegum Náttúruminjasafnsins. Jafnframt að finna ákvæði um samstarf stofnananna um gerð fræðsluefnis fyrir almenning og aðstoð Náttúrufræðistofnunar við öflun náttúrugripa sem lögum samkvæmt ekki verða fengnir með öðrum hætti. Þá mun Náttúruminjasafnið taka yfir umsjón með útlánum á munum úr safnkosti Náttúrufræðistofnunar sem ætlaðir eru til sýningar hjá þriðja aðila.

Til að tryggja samstarf stofnananna og fylgja eftir nýja samkomulaginu verður settur á fót fjögurra manna samráðshópur, skipaður tveimur fulltrúum frá hvorri stofnun. Endurskoða skal samkomulagið á minnst þriggja ári fresti.

„Þetta er einkar gott samkomulag milli systurstofnananna og mjög ánægjuleg stund.“ sagði Hilmar J. Malmquist forstöðumaður Náttúruminjasafnsins við undirskriftina og bætti við … „Samkomulagið felur í sér margvísleg samlegðaráhrif og hagræðingu í starfsemi beggja stofnananna, sem er vel og styrkir málstaðinn sem báðar stofnanirnar standa fyrir – aukin þekking í náttúrufræðum og betri skilningur á mikilvægi sjálfbærni í allri umgengni við náttúruna.“