Þetta verk var ritað á Suðurnesjum árið 1858. Wolley og félagi hans Alfred Newton voru að leita að geirfuglum, fundu þá hvergi (síðustu fuglarnir höfðu verið felldir við Eldey fjórtán árum áður), en tóku viðtöl við sjómenn sem tóku þátt í síðasta róðrinum. Síðar kom á daginn að þessi Íslandsleiðangur hafði sett aldauða tegunda á dagskrá.

Margur hefur flett verki Wolleys á Bókasafni Cambridge-háskóla, en nú er það öllum aðgengilegt, í ritstjórn Más Jónssonar, prófessors í sagnfræði og Gísla Pálssonar, prófessors emeritus í mannfræði. Már átti frumkvæðið að þessari útgáfu og hann á heiðurinn af vandaðri meðferð handritsins. Útgefandi er Pelagic Publishing í London. Bókin inniheldur, auk handritsins, ítarlegan inngang ritstjóranna, greinar eftir þrjá þekkta fræðimenn, Tim Birkhead, Petru Tjitske Kalshoven og William Montevecchi, formála Errols Fullers og þrjár greinar eftir Wolley og Newton.

Útgáfunni verður fagnað í Bóksölu stúdenta 22. október kl. 15:30.

Náttúruminjasafn Íslands styrkti útgáfuna.

Rannveig Magnúsdóttir, líffræðingur hjá Náttúrminjasafni Íslands, hlaut í lok september mánaðar 900 þúsund króna styrk frá Hagþenki fyrir verkefnið Vatn til framtíðar. Sótt var um styrkinn til að vinna að aðgengilegri handbók um vatn fyrir kennara á öllum skólastigum, kennaranema og almenning.

Bókin mun fjalla um mikilvægi vatns fyrir náttúru og samfélag og þær áskoranir sem tengjast vernd þess og sjálfbærri nýtingu. Markmið verkefnisins er að vekja áhuga á vatni og auka skilning á tengslum þess við líf, náttúru og samfélög.

Verkefnið tengist þátttöku Náttúruminjasafnsins í ICEWATER, þar sem safnið sinnir miðlun til almennings og skóla.